“ເສືອໂຄ່ງລຸຍໄຟ!” ຜະລິດຕະພັນລາວ ທີ່ກຳລັງໄດ້ຮັບຄວາມນິຍົມ.
#InterviewLaoProduct | ຫຼາຍຄົນອາດສົງໄສວ່າ “ເສືອໂຄ່ງລຸຍໄຟ” ແມ່ນຫຍັງ ຄວາມຈິງແລ້ວ “ເສືອໂຄ່ງລຸຍໄຟ” ແມ່ນຊື່ຂອງຜະລິດຕະພັນ

ໜັງຄວາຍ-ໜັງງົວ ຈືນ ທີ່ໄດ້ຖືກພັດທະນາ ຈາກພູມປັນຍາຂອງຄົນລາວ ຈົນກາຍມາເປັນຜະລິດຕະພັນຂອງແກ້ມຊັ້ນດີ ທີ່ປັດຈຸບັນກຳລັງໄດ້ຮັບຄວາມນິຍົມໃນສັງຄົມ.
ທ່ານ ຫຸມພັນ ໄຊຍາລາດ, ເຈົ້າຂອງຜະລິດຕະພັນ ໜັງພອງງົວ-ຄວາຍຈືນ “ເສືອໂຄ່ງລຸຍໄຟ” ກ່າວວ່າ: ການທີ່ສ້າງຜະລິດຕະພັນ “ເສືອໂຄ່ງລຸຍໄຟ” ຂຶ້ນມາ ກໍເພື່ອອຳນວຍຄວາມສະດວກໃຫ້ກັບຜູ້ບໍລິໂພກໃນການກິນໜັງຍຳ ໃຫ້ງ່າຍຂຶ້ນ ບໍ່ຕ້ອງໄປຈີ່, ໄປຈືນໃຫ້ເສຍເວລາ ພຽງແຕ່ຈີກຊອງກໍສາມາດຮັບປະທານໄດ້ເລີຍ, ເຊິ່ງແນວຄວາມຄິດດັ່ງກ່າວ ຖືວ່າຕອບໂຈດໃຫ້ກັບຄົນທີ່ມັກກິນໜັງພອງໄດ້ເປັນຢ່າງດີ ໂດຍສະເພາະແມ່ນກິນແກ້ມກັບຕຳໝາກຫຸ່ງ ຫຼື ແກ້ມກັບເຄື່ອງດື່ມເຢັນໆ.
ທ່ານ ຫຸມພັນ ບອກວ່າ: ກວ່າຈະອອກມາເປັນຜະລິດຕະພັນນີ້ໄດ້ ແມ່ນເພິ່ນໄດ້ໃຊ້ເວລາຢູ່ 1 ປີ ໃນການທົດລອງສູດຕ່າງໆ ທັງໃນດ້ານຂັ້ນຕອນໃນການຜະລິດ, ຣົດຊາດ, ການເກັບຮັກສາ ເພື່ອໃຫ້ສາມາດເກັບຮັກສາໄວ້ໄດ້ດົນ ໂດຍຜະລິດຕະພັນ “ເສືອໂຄ່ງລຸຍໄຟ” ສາມາດເກັບຮັກສາໄວ້ໄດ້ດົນເຖິງ 6 ເດືອນ.
ນອກຈາກນີ້, ການຄິດຊື່ຜະລິດຕະພັນ ກໍເປັນອີກສິ່ງໜຶ່ງທີ່ສຳຄັນ ໂດຍໄດ້ໃຊ້ເວລາ 1 ເດືອນ ໃນການຄິດຄົ້ນຊື່ ຈົນໄດ້ອອກມາເປັນຊື່ຜະລິດຕະພັນ “ເສືອໂຄ່ງລຸຍໄຟ” ໃນປັດຈຸບັນ.
ສຳລັບລາຄາໃນການຈຳໜ່າຍຕາມທ້ອງຕະຫຼາດເພິ່ນມີລາຄາຂາຍຢູ່ທີ່ 1 ຖົງ 10,000 ກີບ (ລາຄາຂາຍສົ່ງ) ໂດຍເພິ່ນຈະເຮັດເປັນແພັກ ແພັກລະ 10 ຖົງ; ນອກຈາກນີ້, ຜະລິດຕະພັນຂອງເພິ່ນຍັງໄດ້ວາງຂາຍຢູ່ຕາມຮ້ານມິນິມາກຕ່າງໆເຊັ່ນ: ບິກຊີ, ເຈມາກ, ໂຊກໄຊ, ໂຊກທະວີ, ຈິບຟີ ແລະ ອື່ນໆ.
ທ່ານ ຫຸມພັນ ຍັງກ່າວຕື່ມອີກວ່າ: ພາຍໃນເດືອນ ທັນວາ 2024 ນີ້ ເພິ່ນກຽມເຮັດຣົດຊາດໃໝ່ອອກມາ ເພື່ອຂະຫຍາຍຕະຫຼາດ ເຊິ່ງຢາກຝາກເຖິງຄົນລາວຊ່ວຍສະໜັບສະໜູນຜະລິດຕະພັນຂອງຄົນລາວນຳກັນ ເພື່ອເສີມສ້າງເສດຖະກິດລາວໃຫ້ກ້າວໄປ ແລະ ຢາກຂອບໃຈລູກຄ້າທຸກທ່ານທີ່ຊ່ວຍສະໜັບສະໜຸນສິນຄ້າລາວນຳກັນ.

ແຫລ່ງ​ຂ່າວ: ຂອບ​ໃຈ​ທາງວາ​ລະ​ສານ insidelaos
#ຜະລິດຕະພັນລາວ #ສິນຄ້າລາວ #ເສືອໂຄ່ງລຸຍໄຟ

#ອິນໄຊລາວ #InsideLaos ສາລະດີໆ ມີຢູ່ບ່ອນນີ້.